Tuesday, April 8, 2014

அல்லாஹ்வின் சந்நிதானத்தில்

தங்கையே

ஒரு கிராமத்து நதியின்

குளிர்ச்சியாக நீ

எங்கள் நெஞ்சில் நிறைந்திருக்கின்றாய்..


ஒரு நிலாக்கீற்றின்

ஒளி போல நீ

நீங்கிச் சென்றாலும்

எமக்குள் வாழ்க்கின்றாய்..


வசந்த காற்று வீசும்

இடத்தில்

ஒரு தென்றலாக

நினைவில் மலர்கிறாய்..


உலகத்தின் அழுக்குகளை

காணக் கூடாதென்றா

கண்மூடிக்கொண்டாய்?


பாவம் செய்யும் நீசர்களின்

முகத்தில் விளிக்க வேண்டாமென்றா

விழி திறக்குமுன்னேயே

உயிர் நிறுத்திக்கொண்டாய்?


நாளை மறுமையில்

சுவர்க்கத்தின் வாசலிலே

ஒரு குழந்தை தேவதையாக

நீ எங்களை

அழைத்துப்போவாய்


அங்கே

நாங்களெல்லாம்

ஒன்றாயிருந்து


உம்மம்மாவின் மடியில்

சாய்ந்திருக்கலாம்

அப்பாவுடனிருந்து

கதைகள் கேட்கலாம்..


நான் .. நீ

உம்மா.. வாப்பா

தம்பி.. தங்கை என்ற

நமது குருவிக் கூட்டுக் குடும்பம்


அல்லாஹ்வின் சந்நிதானத்தில்

சந்தோஷமாயிருக்கலாம்!!!

Sunday, January 19, 2014

வாழ்க்கை எனும் நாடக மேடை!


தோற்றத்தில் நைந்துள்ளோமா
ஏற்றத்தில் தொய்ந்துள்ளோமா
மாற்றங்கள் நடக்கும் என்றே
நாற்றத்தில் வாழ்கிறோமா?

கறுத்த உடலோடும், வெயிலோடும்
பெருத்த மழையோடும், பனியோடும்
சிறுத்த லாபத்துக்காகN;வண்டி
பொறுத்துப் பொறுத்து இருக்கிறோமா?

கரிய புகை படிந்த காம்பறாவில்
சிறிய, பெரிய பிள்ளைகளுடன்
அரியதொரு வாழ்வைத்தான்
தெரியாமலே கடத்திவிட்டோம்!

அன்னை போல் மதித்தேதான்
மண்ணை நாம் மிதித்தோமே
பெண்ணையும், ஆணையும்
கண்ணைப் போல் காத்தோமே!

மலை வாழ்க்கை பழகிடுச்சு
இலைசாயம் இனிச்சிடுச்சி
தலை தோறும் வறுமை எனும்
அலை வந்து அடிச்சிடுச்சு!

சாதுவாக வாழ்கின்றோம்
மாதுகளை மதிக்கின்றோம்
தீது என நன்குணர்ந்து
சூது கூட தவிர்த்திருந்தோம்!

சுமை வந்து நெரித்த போதும்
எமைப் பற்றி கவலையில்லை
இமை போல துரை காப்பார்
நமை என்று நம்பி நின்றோம்!

துடுப்பு இல்லா ஓடம் போல
இடுப்பு கடுத்தே வேலை செய்து
அடுப்பு மூட்டிகொஞ்சம் சமைத்து
விடுப்பு பார்க்கும் வாழ்க்கை நமதே!

படித்த இளைஞர் வாழ்க்கையாவும்
குடித்துக் குடித்தே வீணாய் போகும்
வடித்த கண்ணீர் ஆவியாகும்
நடித்த வாழ்க்கை மேடை ஏறும்!

நாளை எப்படி கழியும் என்று
வேளை தோறும் சிந்தித்தேதான்
காலை மாலை ஓலைக் குடிலில்
ஏழை வாழ்க்கை முடிஞ்சு போகும்!!!

Thursday, January 16, 2014

அன்புத் தோழிக்கு

நீ என்மீது
அளவு கடந்த அன்பை காட்டியபோது
என்னால் அதனைப் புரிந்து கொள்ள
இயலவில்லை

அடிக்கடி வருகின்ற
உன் மெஸேஜ்களும்
மிஸ்கோல்களும்
நான் உன்னிடம் பேசாதபோது
நீ கொண்ட கோபமும்
உண்மையில் என்னை
எரிச்சல் அடையவே செய்தன

எனது அன்பை வழிபார்த்து
நீ காட்டிய பாசத்தின் தடயங்கள்
அப்போதெல்லாம்
என் இதயத்தில் பதியவேயில்லை

உன்னை சந்தித்த தருணத்தில்
உன்னிடம் ஏற்பட்ட
அந்த அன்பு கூட
காலப்போக்கில்
காணாமலேயே போனது

கண்ணில் காணாத பொருள்
கருத்திலிருந்து மறையும்
என்ற கூற்றுக்கிணங்க
உன்னை நான்
மறந்தே போனேன் தெரியுமா?

ஆனால்

இன்று
நானும் உன்னைப் போல
ஒரு அன்புக்காக ஏங்குகின்றேன்
உன்னைப் போலவே
மெஸேஜ் பண்ணுகிறேன்
அடிக்கடி மிஸ்கோல் கொடுக்கிறேன்..

நான் எப்படி உன்னை
தவிர்த்துவிட்டேனோ
அதைப் போலவே
இல்லையில்லை
அதையும்விட இப்போது
தவிர்க்கப்படுகிறேன்

என்னில் பாசம் காட்டாத இடத்தில்
நான் வைத்த அன்பு
கண்டுகொள்ளப்படாமல்
அந்தரத்தில் இருக்கிறது

அதனால்தான்
நீ கொண்ட அன்பின் ஆழத்தையும்
பிரிவின் நீளத்தையும்
காலம் இப்போது
நன்றாகவே புரிய வைத்திருக்கிறது!!!

Wednesday, December 25, 2013

நீ என்ன செய்வாய் பாவம்!

நீயும் நானும்
ஒன்றாயிருந்து சாப்பிடும்
அந்த சிற்றுண்டிச் சாலை
இன்று ஏனோ வெறுமையாக!

உன் பமுகம் பார்த்தபடியே
நான் உண்ணும் கவளங்கள்
நீயில்லாத இன்று கசப்பாக!

பலர் சுற்றியிருந்த போதும்
நான் மட்டும்
இந்த குரூர உலகில்
தனித்து விடப்பட்டதாய்
உணர முடிந்தது என்னால்..
இந்த மாற்றங்கள் எல்லாம்
ஏற்பட்டதெனக்கு உன்னால்!

உன் அருகேயிருந்து
பேசும் அழகிய தருணங்கள்..
இன்று ஆயிரம் முறை
தோன்றி மறைந்தது
தெரியுமா உனக்கு?

காலை, பகல், மாலை
எல்லாம் உன்னோடு
கென்டீன் செல்ல காத்திருப்பேனே
அந்த சுகம்
இன்று சுமையாகிப் போனதில்
ஆச்சரியம் இல்லை

உனக்கு இப்படியெல்லாம்
இருந்திருக்காது..
ஏனெனில்
இந்த அவஸ்தையை
ஆரம்பித்து வைத்த
பாவி நான் தானே.
நீ என்ன செய்வாய்
பாவம்!

என்னவென்று தெரியவில்லை

என்னவென்று தெரியவில்லை
ஒருநாளும் இல்லாமல்
இன்று நேரகாலத்துடன்
போக வேண்டும்
போல் இருக்கின்றது

தலையணையில்
முகம் புதைத்து
அழுது தீர்க்க வேண்டும்
போலிருக்கின்றது

நண்பர்களிடமெல்லாம்
மன்னிப்பு கேட்டு
மகிழ்ச்சியாக இருக்க வேண்டும்
போலிருக்கின்றது

எங்கள் வீட்டுக்குப் போய்
உம்மாவின் மடியில்
தலை வைத்துப் படுக்க வேண்டும்
போலிருக்கின்றது

வாப்பாவுடன் எல்லோரும் அமர்ந்து
அனைவரும் ஒன்றாக சாப்பிட வேண்டும்
போல் இருக்கின்றது

மீண்டும் சிறுகுழந்தையாய் மாறி
என் தம்பி, தங்கையுடன்
செல்லச் சண்டை போட வேண்டும்
போலிருக்கின்றது

இந்த உலகத்தையே மறந்து
பட்டாம்பூச்சி பிடித்து
விளையாடிக் களைக்க வேண்டும்
போலிருக்கின்றது!

கடற்கரைக்குச் சென்று
கடலிடம் என் சோகங்களை
கத்திச் சொல்ல வேண்டும்
போலிருக்கின்றது

யார் கண்ணிலும் படாமல்
யாருக்கும் வலி கொடுக்காமல்
செத்துப் போக வேண்டும்
போலிருக்கின்றது

உனக்கொன்று தெரியுமா?

என் இதய மாளிகையில்
சிம்மாசனமிட்டு
அமர்ந்திருக்கும்
என்னவனே!

உனக்கொன்று தெரியுமா?
நான் நினைத்திருந்தேன்
நீ என்னில்
கலந்துவிட்டதாக..

இல்லை
நான் தான்
உன்னுள்  தொலைந்துவிட்டேன்!

கனவில் வருகிறேன் என்று
சொல்லிச் சென்றவனே!
பின்பு
கனவைத் திருடி
என் தூக்கம் தின்றவனே!

இரவு பதினொரு மணிக்கு
வாசிக்க வைத்தவனே
உன்னை மட்டும்
சுவாசிக்க வைத்தவனே

வாரநாட்கள் ஐந்தும்
நரகம் போல் இருந்தது அன்று..
இன்று அவை
தேன் சொட்டுகிறது

சுவர்க்கமாகத் தெரிந்த
விடுமுறை நாட்கள்
இன்று தேள் கொட்டுகின்றது

அழகிய பூக்களை எல்லாம்
மாலை செய்து உனக்கு
சூட நினைத்தேன்
'பூவுக்கே பூ மாலையா?' என
பூக்கள் சொல்லிச் சிரித்தன என்றாய்

வான் பிறையை ரசித்திருந்தேன்
'உன்னவள் நறுக்கி வீசிய
நகத்துண்டை விடவா
நான் அழகு?' என்று கூறி அது
நாணிச் செத்தது என்றாய்

எங்கு பார்த்தாலும்
உன் முகம்
திரும்புகிற திசையெல்லாம்
உன் ஞாபகம் என்றாய்
இப்படி சொல்லிச் சொல்லியே என்னை
உனதாக்கிக் கொண்டாய்!!!

சாயம்போன இதயம்

மறந்து போனேன் எல்லாமே..
என் இயல்பை
என் இருப்பை..

உன்னை
உன் அன்பை..
எல்லாமே மறந்துபோனேன் இன்று!

எனக்கு என்ன ஆயிற்று?
ஏன் இப்படிக் கோபப்படுகின்றேன்
தனிமையை விரும்புகின்றேன்
சந்தோசத்தைத் தொலைக்கிறேன்..

உனது அருகாமை தந்த
அந்த இன்பம்
இன்று இன்பமாக இருக்கவில்லை..

என் கண்கள் கலங்குகின்றது
தொண்டை அடைக்கிறது
அழ வேண்டும்போல் தோன்றுகிறது
இதயம் விம்மி வெடிக்கின்றது!

என்னைப் புரிந்து கொள்ள
அவசியங்கள் இங்கில்லை..
ஆனால்
என்னை பிழிந்து கொல்ல
அதிகாரம் தந்தது யார்?

உன்னால் மட்டுமே பிடிக்கும் அலுவலகம்
இன்று
ஏனோ வெறுத்தே போனது!

நீ சொல்வாயே அடிக்கடி
பச்சோந்திகள் பதுங்கியிருக்கும்
உலகம் இதுவென்று
உண்மைதான்!

அன்பின் விலாசம்
திசை தெரியாமல் போனது
சாப்பிடும் போதும்
மன இறுக்கம் இருந்தது

எதிர்பார்ப்புகள் எல்லாம்
ஏமாற்றம் அடைந்தால்
அன்பின் முகவரியும்
அழிந்தல்லவா போய்விடும்?

அகத்தில் உள்ளதை
முகத்தில் கண்டுவிட்டாய்
மறக்க முயன்றும்
தோற்றுத்தான் போனேன்

பயமாயிருக்கின்றது
என் வாழ்க்கை முழுவதும் இப்படி
தோற்றுப் போவேனோ என்றெண்ணி!

சுயநல வேட்கையில்
சுற்றியிருக்கும் சொந்தங்கள்
எதிரியை மட்டுமல்ல
எதிரே இருப்பவரையும் குறிபார்க்கிறது..

கழித்தது எப்படியோ நீ
கடந்த காலங்களை..

வாழ்வென்றால்
ஆயிரமிருக்கும் என்று
நீ வார்த்தையில் சொல்லிவிடலாம்

ஆனால்
காயப்பட்ட உள்ளத்துக்கும்
சாயம்போன இதயத்துக்கும்தான் தெரியும்
வலியின் ஊடுறுவல்கள்!!!

இன்னும் உன் குரல் கேட்கிறது கவிதைத் தொகுதி பற்றிய இரசனைக் குறிப்பு - வெலிகம ரிம்ஸா முஹம்மத்

இன்னும் உன் குரல் கேட்கிறது கவிதைத் தொகுதி பற்றிய இரசனைக் குறிப்பு


வெலிகம ரிம்ஸா முஹம்மத்


உதட்டில் ஒன்றோடும்
உள்ளத்தில் வேறொன்றோடும்
புரட்டுக்கள் புரியாத
புனித மனம் கொண்டோருக்கு

இன்னும் உன் குரல் கேட்கிறது என்ற தனது கன்னிக் கவிதைத் தொகுதியை சமர்ப்பித்திருக்கிறார் ஊவா மாகாணத்தின் தியத்தலாவையை தனது சொந்த இடமாகக் கொண்ட கவிஞர் தியத்தலாவ எச்.எப். ரிஸ்னா அவர்கள். புரவலர் புத்தகப் பூங்காவின் 30 ஆவது வெளியீடாக மலர்ந்திருக்கும் இத்தொகுதி 72 பக்கங்களில் 56 கவிதைகளை உள்ளடக்கி வெளிவந்துள்ளது.

கவிதை, சிறுகதை, விமர்சனம், சிறுவர் இலக்கியம் ஆகிய துறைகளில் தடம்பதித்திருக்கும் இவர் பூங்காவனம் என்ற காலாண்டு இலக்கியச் சஞ்சிகையின் துணை ஆசிரியர் என்பதும் குறிப்பிடத்தக்கது.

கலாபூஷணம் எஸ்.ஐ. நாகூர் கனி அவர்கள் தனது ஆசியுரையில் கீழுள்ளவாறு குறிப்பிட்டுள்ளார்.

மலையக மண்ணின் மங்கை - கவிஞை
செல்வி எச்.எப். ரிஸ்னா என்பா(ள்)ர்
நிலையிலா உலகில் தன் பெயர் நிலைத்திட
நெஞ்சமர் கவிதை நிறையவே தந்தார்.

திறந்த கதவுள் தெரிந்தவை என்ற தலைப்பிட்டு கவிஞர் ஏ.இக்பால் அவர்கள் தனது அணிந்துரையில் ஒப்பீடு, குறியீடு இவ்விரு முறைகளிலும் குறியீடுதான் கருத்தை செம்மையாக வெளிப்படுத்தும். இப்படிமம் வாசகனை உணரவைக்கும். இக்கருத்தை இத்தொகுதியில் அதிகம் காணலாம். ரிஸ்னாவின் கவிதைகளில் கற்பனை, புதிய பார்வை, பாதிப்பு மூன்றும் கலந்துள்ளன என்கிறார்.

நீ வாழ்வது மேல் (பக்கம் 13) என்ற கவிதை போலி முகம் காட்டிப் பழகும் மனிதர்களுக்கு சாட்டையடியாக விழுந்திருக்கிறது. தன்னை நல்லவன் என்று காட்டிக்கொண்டும், தனக்கு உதவியவர்களை மறந்தும் வாழும் பலருக்கு இக்கவிதை பொருத்தமான அறிவுரையைப் பகிர்ந்து நிற்கிறது. நாம் பழகும், அல்லது பழகிய பலரில் நமக்குத் தெரியாமலேயே பொறாமைக் குணம்கொண்டு குழிவெட்டுபவர்கள் இருக்கின்றார்கள். அத்தகையவர்களை கண்டாலே விலக வேண்டும் என்கிறார் கவிஞர்.

அரிதாரம் பூசாமல்
பழகு - தீயவர் உன்னருகே
வந்தாலே விலகு..
சமூகத்தில் பலபேரு
ஏமாற்றக் காத்திருப்பர்
இது தானே இன்றைய உலகு..
இதையறிந்தாலே உன் வாழ்வு அழகு!

கற்பு என்பது ஆண்வர்க்கத்துக்கும், பெண் வர்க்ககத்துக்கும் பொதுவானது. ஆனால் பெண்கள் சருக்கினால் சரித்திரம், ஆண்கள் சறுக்கினால் சம்பவம் என்று கணித்து வைத்திருக்கிறது இந்த குருட்டு சமூகம். எதுவென்றாலும் உத்தமமமானவர்கள் ஆண்களிலும் இருக்கிறார்கள். பெண்களிலும் இருக்கிறார்கள். அத்தகைய தூய மனம் கொண்ட ஒரு ஆணின் மனது மழை ப்ரியம் (பக்கம் 16) என்ற கவிதையில் இவ்வாறு திறந்திருக்கிறது.

நகம் கூட உனைத் தவிர
பிற பெண்ணில் பட்டதில்லை..
உன்னையன்றிய எவளையும்
மனசாலும் தொட்டதில்லை!

பெற்Nறூரை, குடும்பத்தினரை, சொந்த ஊரை எல்லாம் விட்டு இன்று தலை நகரில் வந்து தமக்கான அடையாளத்தை பலர் பதிய வைக்கின்றார்கள். அவ்வாறு தனது ஆளுமையை பதிய முனையும் பலபேர்களில் கவிஞரும் ஒருவர் என்பது இக்கவிதையினூடே புலப்படுகின்றது. உம்மாவுக்கு (பக்கம் 17)

உம்மா!
பிடிக்கவில்லை..
ஊரில் நீங்களும்
தூரத்தில் நானுமாய்
இருக்கும் இந்தக்காலங்கள்!
................
................
என் வாழ்க்கையின்
வெற்றிப் படிகளை எட்டி
நானொரு நாள்
முன்னேறி வருவேன்..
அதுவரை கொஞ்சம் பொறுத்திருங்கள்
வாப்பாவுக்கும் சொல்லுங்கள்!

ஒரு பெண் சுமங்கலியாய் வாழும் போது வாழ்த்தும் பலபேர் அவள் அமங்கலியாகிவிட்ட பின்பு திருமணங்கள், திருவிழாக்கள் போன்ற இடத்துக்கும் அண்ட விடுவதில்லை. சபிக்கப்பட்டவர்கள் போன்று அவர்களை ஒதுக்கி விடுகின்றார்கள். தனது துணைவிக்கு அவ்வாறானதொரு நிலைமை வந்துவிடக் கூடாது என்பதில் அக்கறைக் காட்டும் மரண அவஸ்தையிலிருக்கும் அன்புக் கணவனின் வேண்டுகோளாக ஒரு வீPணை அழுகிறது (பக்கம் 30) என்ற கவிதை எழுதப்பட்டிருக்கிறது. இன்றைய காலத்தில் விதவைகள் மறுமணம் புரிவது மெல்ல மெல்ல ஏற்றுக்கொள்ளப்பட்டு வருவது வரவேற்கத்தக்கதாகும்.

வெள்ளாடை தரித்து நீ
வெறுமனே இருந்திடாதே..
வாழும் வரை வசந்தமாய்
வாழுவதை மறந்திடாதே!

எச்.எப். ரிஸ்னாவின் கவிதைகளில் பல சந்தக் கவிதையாக எழுதப்பட்டிருப்பவை. இது அவரது தனித்துவ அடையாளமாகும். ஓசை நயமும், சந்தமும் இணைந்து எழுதப்படும் கவிஞரின் எல்லா கவிதைகளும் தங்கு தடையின்றி எளிமையான நடையில் எழுதப்பட்டிருக்கின்றது. முதல் முறை வாசிக்கும்போதே மனதைத் தொட்டுவிடும் வல்லமை ரிஸ்னாவின் கவிதைகளுக்கு உண்டு. அவ்வாறான ஒரு கவிதையின் சில வரிகள் இதோ... (மரணத்தின் தேதி - பக்கம் 45)

இத்தனை நாள்
பார்த்த நிலா
ஒளி மங்கி வீசும்..
இதயத்தின் பாகமெல்லாம்
தீ கருகிய வாசம்!

உன் மாற்றம் என்னுள்ளே
தீயள்ளி போடும்..
உன் நினைப்பு
என் உயிரின்
அந்தம் வரை ஓடும்!

கவிதைத் தொகுதியின் மகுடக் கவிதையாக விளங்கும் இன்னும் உன் குரல் கேட்கிறது (பக்கம் 60) என்ற கவிதை ஓர் ஆத்மாவின் தேடலை தன்னகத்தே கொண்டிருக்கிறது. கவிதையின் கருத்துக்களில் சொட்டும் ஈரம் மனதிலும் கசிந்துவிடுகிறது. இதோ சில வரிகள்...

'நீ தான் என் எல்லாமே'
என அடிக்கடி நீ சொன்னது
இன்னும் ஞாபகமிருக்கு!

குயிலே!
உனதந்த குரலின்னும்
காதுக்குள் ஈரமாய்
கேட்டுக்கிட்டிருக்கு!

மனசாட்சி இல்லாமல், அல்லது சட்டத்து புறம்பான செயல்கள் நம் கண்முன் தினமும் நிகழ்ந்துகொண்டுதான் இருக்கின்றன. அவ்வாறான சில விடயங்களைத் தொட்டுக்காட்டி கடல் கொண்டு போகட்டும் (பக்கம் 66) எனும் கவிதை எழுதப்பட்டிருப்பது வரவேற்புக்குரியது.

பாடசாலை பருவத்து
சிறார்களை வைத்து நிதம்
தொழில் செய்து
பிழைப்பவர்கள் சாகட்டும்..
அவரின் அந்தஸ்து சொத்தெல்லாம்
இப்படித்தான் வந்ததென்றால்
கடல்பொங்கி எல்லாம் கொண்டு போகட்டும்!!!

பூ மலர்வது, பொழுது புலர்வது... இப்படி எல்லாமே ஒரு கவிஞனுக்கு உவகையளிப்பன தான். அவ்வாறு பிறப்பவைகள் கூட காலப்போக்கில் பனியின் தொடுகையாகவும், தணலின் சுடுகையாகவும் மாறிப் போகின்றன என்று தனதுரையில் கூறியிருக்கும் நூலாசிரியர் கவிதைகளில் அகம் சார்ந்த கருத்துக்களைத் தவிர பெண்ணியம், ஆன்மீகம், தனிமை, துன்பம், சந்தோஷம், மலையகம் சார் பிரச்சனைகள், சமூக அவலம், சீதனக்கொடுமை, சுனாமி போன்ற உணர்வுகளும் கலந்திருக்கின்றன. காத்திரமான பல கவிதைகளைத் தந்த நூலாசிரியர் தியத்தலாவ எச்.எப். ரிஸ்னாவுக்கு எனது வாழ்த்துக்கள்!!!

நூலின் பெயர் - இன்னும் உன் குரல் கேட்கிறது
நூலின் வகை - கவிதைகள்
நூலாசிரியர் - தியத்தலாவ எச்.எப். ரிஸ்னா
வெளியீடு - புரவலர் புத்தகப் பூங்கா
தொலைபேசி - 0775009222, 0719200580
விலை - 180 ரூபாய்

தியத்தலாவ எச்.எப். ரிஸ்னாவின் இன்னும் உன் குரல் கேட்கிறது கவிதை நூலின் மீது ஒரு மதிப்பீடு

எம்.எம். மன்ஸுர் – மாவனல்லை

என்றும் இலக்கியக்குச் சேவையாற்ற வேண்டும் என்ற எண்ணத்தில் தன்னகத்தே நிறுவனம் ஒன்றை வைத்திருக்கும் புரவலர் அல்ஹாஜ் ஹாஸீம் உமர் அவர்கள்இ எழுத்தாளர்களின் படைப்புக்களை நூல் வடிவில் கொண்டு வருவதில் கண்ணும் கருத்துமாக இருந்து செயற்பட்டு வருகிறார். 2007 ஆம் ஆண்டு தொடங்கிய இந்த எழுத்தாளர்களுக்கு உதவும் பணி மூலம் இதுவரை முப்பது நூல்களை இலவசமாக வெளியிட்டு வசதியற்ற எழுத்தாளர்களுக்கும்இ படைப்பாளிகளுக்கும் ஆதரவளித்து ஈழத்து இலக்கிய உலகுக்குப் பெருமை சேர்த்திருக்கிறார்.

அந்த வகையில் இளம் கவிதாயினி தியத்தலாவ எச்.எப். ரிஸ்னாவின் இன்னும் உன் குரல் கேட்கிறது கவிதை நூல் கொழும்புத் தமிழ் சங்க சங்கரப்பிள்ளை மண்டபத்தில் அண்மையில் நடைபெற்றது.

இன்னும் உன் குரல் கேட்கிறது ஆம் அது ஏன் இன்னும் கேட்கிறது என்பதை அறிய ஆவலாய் நூலைக் கையில் எடுக்கும் போதேஇ இன்னும் ஓர் இளம் கவிதாயினியான வெலிகம ரிம்ஸா முஹம்மதின் கற்பனைத் திரத்தில் கணனிக் கைவண்ணத்தில் உருவான வானத்து தேவதையின் வண்ண முகப் பொழிவு கொண்ட முன்பக்க அட்டை கருத்தைக் கவரும் விதத்தில் உள் நுழையச் செய்வதில் விந்தை ஏதுமில்லை.

உள்ளே பூங்காவின் பதிப்புத்துறைச் செயலாளர்இ மூத்த எழுத்தாளர்இ அதிலும் சத்திய எழுத்தாளர் எஸ்.ஐ. நாகூர் கனி அவர்கள் கவிதாயினியை பூந்தமிழ் ஆசி கொண்டு பாமாலை சூட்டிச் சிறப்பித்திருக்கிறார். மூத்த கவிஞர்இ கவிஞர் ஏ. இக்பால் அவர்கள் முகப்பூ தந்து தமது கருத்துக்களைத் தெரிவித்திருக்கிறார். அதிலே இலக்கண காலத்தே இருந்தே செய்யுள் வடிவம் இன்று திரிந்துஇ பிரிந்துஇ உருமாறி இன்றைய செல்வாக்குப் பெற்றுள்ள கவி வடிவத்தைப் பற்றி விளக்கியிருக்கிறார். அதாவது ஷஷபாரதி முதல் வால்ட் விட்மன்இ கலீல் ஜிப்ரான்இ உமர் கையாம்இ தாகூர் போன்றவர்களின் கவிதைகளின் தாக்கம் தான் இன்றைய கவிதைகளின் உருவாக்கத்துக்குக் காரணம்|| என்பதை அழகாகச் சுட்டிக் காட்டியிருக்கிறார்.

கவிதாயினி தனது முன்னுரையில் தனது கவிதைகளின் தன்மையைப் பற்றிக் குறிப்பிட்டிருக்கிறார். அவை அகம் சார்ந்த கருத்துக்களைத் தவிர பெண்ணியம்இ ஆன்மீகம்இ தனிமைஇ துன்பம்இ சந்தோசம்இ மலையகம் சார்ந்த பிரச்சினைகள்இ சமூக அவலங்கள்இ சீதனக் கொடுமைஇ சுனாமி உணர்வுகளைத் தரக் கூடிய கருத்துக்களைப் பற்றிப் பேசுகின்றன.

கவிஞை மலையகத்தைப் பிறப்பிடமாகக் கொண்டிருப்பதால் மலையக மக்களின் வாழ்க்கையைஇ அதிலும் மலையகப் பெண்களின் வாழ்வியலினை மிக அழகாகப் படம் பிடித்துக் காட்டியிருக்கிறார். அத்தகைய ஒரு கவிதையைப் பாருங்கள். பெண்ணை மாடாக உழைக்கவிட்டுத் தான் மட்டும் கிடைப்பதைச் சாராயக் கடையிலே கொட்டுகிற கொடுமையை வேறு எந்தச் சமூகத்தில் காண முடியும்? பெண்ணியம் பேசும் சீர்திருத்த வாதிகளே சற்றும் திரும்பிப் பாருங்கள் இக்காட்சியினை.

தூபங்களிட்டாற் போல
சாபங்கள் நீங்குறதேயில்ல!
வேர்வை வர ஒழைச்சும்
வேதனமோ பசியாற்றல்ல!
கோர்வையா வெலயேத்தம்
கோமானுக்கு இரக்கமில்ல!

இவ்வரிகளை இலகுவாக நாம் எண்ணிவிட முடியாது. யாரிட்ட சாபமோ மலையக மக்களின் வாழ்வில் துயரங்கள் நீங்கக் காணோம். வியர்வை சிந்தி எவ்வளவு தான் உழைத்தாலும் கிடைக்கின்ற வேதனம் வாழ்க்கைச் செலவுகளுக்குப் போதுமானதாக இல்லை. நாளுக்கு நாள் விலையேற்றம். இது தோட்ட எஜமானார்களுக்கு விளங்கவில்லையா? என்று கேட்பது போல கவிவரிகளைப் போட்டு மக்கள் மனங்களைச் சிந்திக்க வைத்திருக்கிறார். அது மாத்திரமா?

தேயில சுமை முதுகில
வாழ்க்க சுமை மனசில..
புருஷன் சம்பளத்தோட
சாராயக் கடையில..

என்ற வரிகள் தோட்டத் தொழிலாளர்களின் நிலைமையை எடுத்துக் காட்டுகிறது. இதில் ஒரு வரி வாசகர் கருத்தில் புலப்படாமல் போகிறது. ஷஷபுருஷன் சம்பளத்தோட சாராயக் கடையில|| என்ற வரிகள் உண்மையில் மனைவியின் சம்பளத்தைப் பிடுங்கிக் கொண்டு சாராயக் கடையில் போட்டானா? அல்லது தன்னுடைய சம்பளத்தைக் கொண்டு போய் சாராயக் கடையில் கொடுத்துவிட்டு தண்ணி போட்டுக் கொண்டானா என்பது புரியவில்லை. மலையக மாதுவின் மனக் குமுறல் என்ற கவிதையில் மேற் கண்ட வரிகளைக் காணலாம்.

ஏழ்மையைப் பயன்படுத்தி ஏழைச் சிறார்களைஇ அதுவும் பள்ளி செல்லும் சிறார்களை வேலைக்கமர்த்திஇ வேலை வாங்கும் வேலை கொள்வோரை கவிஞை இப்படிச் சாடுகிறார்.

பாடசாலை பருவத்து
சிறார்களை வைத்து நிதம்
தொழில் செய்து
பிழைப்பவர்கள் சாகட்டும்..
அவரின் அந்தஸ்து சொத்தெல்லாம்
இப்படிதான் வந்ததென்றால்
கடல்பொங்கி எல்லாம் கொண்டு போகட்டும்!!!

என்று தனது மனக்குமுறலைஇ மனித நேயத்தைஇ பாசத்தைக் கொட்டியிருக்கிறார். அப்படிப்பட்ட அவர்களை சுனாமிப் பேரலைகள் கொண்டு போகட்டும் என்று கூடச் சொல்லுகிறார். அதே போல விதி வசத்தால் விலை மாதரானாலும்இ பணத்துக்காக ஆசைப்பட்டு வீணாகத் தமது வாழ்க்கையைக் கெடுத்துக் கொண்ட மாதர்களைப் புயலும் மொத்தமாக அள்ளிச் செல்லட்டும் என வேண்டுகிறார்.

விதி செய்த சதியினிலே
விலைபோகும் மாதுகளை
எப்படி நாம் காப்பாற்ற இயலும்?
வெறும் பணத்துக்காய்
ஆசைப்பட்டு
வீணாகும் சிலபேரை
மொத்தமாக அள்ளி செல்லும் புயலும்!

இன்றைய நாகரிக மோகத்தில் மூழ்கி அரைகுறை ஆடை அணிகளுடன் ஆண்களை மயக்கும் பெண்களின் பங்கைப் பற்றிச் சொல்லும் போது...

ஆடைகளில் கவனமின்றி
ஆடவரைக் கவர்கிறோம்..
வாடை பூசி வெளியேறி
வாலிபரை மயக்குகிறோம்!

மாரழகு வெளித்தெரிய
மாருதம்போல் வருகிறோம்..
பேரழகு பெண் என்று
பேச்சிலும் இதம் தருகிறோம்!

அங்கங்கள் வெளித் தெரிய தன் அழகை வெளிக்காட்டும் பெண்கள்இ அதுதான் தமது அழகு என எண்ணிக் கொண்டு இருக்கிறார்கள் என்ற இந்த வரிகள் மூலம் நாகரீக அசிங்கங்களை விளக்குகிறார்.

இன்று நான்மறை வேதங்களின் நலமிகு கருத்துக்களை மதித்து நடக்காத மனிதன்இ சாத்திரங்கள்இ மந்திரங்களை மறந்து வாழும் மனிதன்இ வழி தவறிப் போவது கண்டு கவிஞை மனமுறுகுகின்றார். அது மாத்திரமல்லாமல் கணவன் தான் உயிர் நீத்ததன் பின்னர் மனைவி வெள்ளாடை தரித்து வீணாக இருந்துவிடாமல் புதுமைப் பெண்ணாய் இருந்துவிடுஇ அடுத்தவரின் பழிச்சொல் கேட்டு பயந்து நீ கோழையாகி விடாமல் துணைவரைத் தேடிக் கொண்டு வாழும் காலமெல்லாம் வசந்தமாய் வாழ்ந்துவிடு என்று பாரதியின் புதுமைக் கருத்துக்களைக் கூறியிருக்கின்றார் இவ்வாறு..

இன்று
வேதங்கள் நிஜமிழந்து
மந்திரங்களும்
பொய்யாகிப் போனது!

ஒருவேளை..
நான் மீளாத்துயிலில்
ஆழ்ந்து விட்டால்..
காவலனைத் தேடிக்கொள்
கட்டாயம்!

என்று உபதேசமாகக் கூறிவிட்டுஇ இப்படியும் புத்திமதியைச் சொல்லி வைக்கிறார்.

வெள்ளாடை தரித்து நீ
வெறுமனே இருந்திடாதே..
வாழும் வரை வசந்தமாய்
வாழுவதை மறந்திடாதே!

என்பதோடு பலி சொல்லும் உலகுக்கு பயந்து நீ சாகாதே என்று அறிவுரையும் கூறுகின்றார்.

ஆணின் நிலையிலிருந்து அனுபவக் கருத்துக்களை அள்ளி வழங்கியிருக்கும் கவிதாயினிஇ பெண்ணியத்தைப் பற்றியும் நிறையப் பேசியிருக்கிறார் தனது கவிதையினூடே. ஒரு பெண்ணினால் ஏமாற்றப்பட்ட ஓர் ஆணின் உள்ளக் குமுறலை மாத்திரமல்லாமல் மனவேதனையையும் இப்படிக் கூறுகின்றார்.

அன்பென்று நடித்தவர்கள்
பாதியிலே மாறினார்கள்..
வாள்முனை வார்த்தைகளால்
இதயத்தைக் கீறினார்கள்!

தாலி நீ ஏற்று விட்டாய்
தாயாகவும் மாறி விட்டாய்..
தாடியுடன் அலையும் நான் – இனி
தாரம் தேடப் போவதில்லை!!!

இறைவன் யாருக்கு யார் என்பதை என்றோ எழுதிவிட்டான். அதன்படி தான் ஒவ்வொருவர் வாழ்க்கையிலும் வாழ்க்கைத் துணைவியோஇ துணைவனோ அமைவதுண்டு. அதனால் அதைப்பற்றி எண்ணிக் கவலைப் படாதே என்று அறிவுரையாய்ச் சொல்லும் கருத்துக்கள் இவை.

கலங்காதே காரிகையே..
காதலுடன் உனை காப்பாற்ற
காளை ஒருவன்
வராமலா இருக்கப் போகிறான்?

யாருக்கு யார் என்று
வல்லவன் என்றோ
எழுதிவிட்டானே அன்று?

தற்காலத்தில் எழுதப்படும் கவிதைகளில் அனேகமானவை தன்னிலையை முன்னிலைப் படுத்தித் தான் எழுதப்படுகின்றன. அதிலும் அனேகமானவை காதல் கவிதைகள் தான். காதல் கவிதைகள் எழுதுவதற்கு அது ஒரு கருவியாக இன்று காணப்படுகின்றது. இந்த வகைக் கவிதைகள் மூலம் அது நிரூபணமாகின்றது. நூலில் அநேகமானவை காதல் கவிதைகளாக இருந்த போதிலும் பல் பொருள் பேசும் கவிதைகளும் காணப்படுவது சிறப்பம்சமாகும். மலையகத்தைப் பற்றிப் பாடியுள்ள கவிதைகள் யாவும் மலையக வாழ்க்கையைப் படம்பிடித்துக் காட்டுகின்றன. இதற்கு முக்கிய ஒரு காரணம் கவிஞை மலை நாட்டைச் சேர்ந்தவராக இருப்பது தான். ஏனெனில் அவர் மலையக வாழ்க்கையை நன்கு அறிந்து தெரிந்து அனுபவ ரீதியாகப் பெற்ற அனுபவங்களைத் தனது கவிதைக்குள் கொண்டு வந்திருக்கிறார் என்பது தான் உண்மை.

இன்பமின்றி வேறு இனி ஏது? என்ற கவிதையில் காணப்படும் சில வரிகள் என்னை மாத்திரமல்ல வாசகர்கள் அனைவரையும் கவரும் என எண்ணுகிறேன்.

அருவிக்கு போகையிலே
ஆத்தங்கரை ஓரத்திலே
குடத்துடனே நீயுந்தான் இருந்தாய்..
குயிலே – குடத்தைப் போல
என் உள்ளம்
தளும்பித் தளும்பித் துடிக்கையிலே
குருவியாக நீ பறந்து சென்றாய்!

இக்கவி வரிகளைப் படிக்கும் போது எனக்கு கிழக்கிலங்கை கிராமியப் பாடல் ஒன்று நினைவுக்கு வருகிறது. அப்பாடலையும் ரிஸ்னாவின் பாடலையும் ஒப்பிட்டுப் பாருங்கள். இரண்டிலும் என்ன வித்தியாசம் காணப்படுகிறதுஇ எத்தகைய உணர்வினைப் பெற முடிகிறது என்பதை. இதோ பாடல்..

தண்ணிக் குடம் எடுத்து
தனி வழியே போகும் பெண்ணே!
தண்ணிக் குடத்துள்ளே
தளும்புதடி என் மனசு!

இதே கருத்தை உள்ளடக்கியதாக கவிஞர் கண்ணதாசனின் பாடல் ஒன்றும் என் நினைவுக்கு வருகிறது. இதோ:-

தண்ணிக் குடம் கக்கத்திலே கண்ணம்மா
தாகத்துக்கு தண்ணி தந்தால் என்னம்மா?

என்று தலைவன் கேட்கஇ

தண்ணிக் குடம் கக்கத்திலே கண்ணய்யா
கண்டவங்க தாகத்துக்கு இல்லையா

இது தலைவி மறுப்பதாக அமைந்துள்ளது. இப்படியாகப் பல ரசனைகள்; நிறைந்ததாக ரிஸ்னாவின் இன்னும் உன் குரல் கேட்கிறது என்ற கவிதைத் தொகுதி அமைந்திருக்கிறது. நூலில் அநேகம் காதல் கவிதைகளாக இருப்பதால் காதலர்களுக்குத் தேனாக இனிக்கும். மட்டுல்லாமல் வேறு பல்வகைப் பொருட்களிலும் கவிதைகள் இடம்பிடித்திருப்பதால் இத்தொகுதி சிறப்பு பெறுகிறது. என்றாலும் ஒரு குறை. உள்ளடக்கத்தில் 68 கவிதைகள் இருப்பதாகக் குறிப்பிட்டு இருந்தாலும் கூட நூலில் இடம் பெற்றிருப்பதோ 56 கவிதைகள் மாத்திரமே. தவறுக்கு யார் காரணமோ???

நூலின் பெயர் – இன்னும் உன் குரல் கேட்கிறது (கவிதைகள்)
நூலாசிரியர் – தியத்தலாவ எச்.எப். ரிஸ்னா
முகவரி – 21 E, Sri Dharmspala Raod, Mount Lavinia.
தொலைபேசி – 0775009222
வெளியீடு – புரவலர் புத்தகப் பூங்கா
விலை – 180/=



திண்ணை வலைத்தளத்தில் இந்த நூல் விமர்சனத்தைப் பார்வையிட

'இன்னும் உன் குரல் கேட்கிறது' கவிதை நூலுக்கான எனது பார்வை பஸ்லி ஹமீட் - தர்கா நகர்

'இன்னும் உன் குரல் கேட்கிறது' கவிதை நூலுக்கான எனது பார்வை

பஸ்லி ஹமீட் - தர்கா நகர்


கவிதை என்ற சொல்லை உச்சரிக்கும்போது மனதில் ஒருவித இனிமை படர்வதை உணரலாம். எழுத்துக்களின் மிக மென்மையான பகுதியாக கவிதை இருப்பதே அதற்கான காரணமாக இருக்கலாம். எந்தவொரு கடினமான அல்லது சிக்கலான விடயத்தையும் கவிதையினூடாக மென்மையான முறையில் சொல்ல முடியும் அல்லது உணாத்த முடியும். மனதில் பொங்கியெழும் கோபத்தையும் கவிதையினூடாக சாந்தமாக வெளிப்படுத்தலாம். இத்தகைய தன்மை கவிதையில் இருப்பதனாலேயே அது வாசகர்களின் உணர்வுகளுடன் எளிதில் கலந்து விடுகின்றது.

கவிதைக்குப் பொதுவான ஒரு வரைவிலக்கணம் சொல்லப்படாத போதிலும், சாதாரணரமாக சொல்ல வரும் ஒரு விடயத்தை சற்று அழகுபடுத்திச் சொல்லும்போது அது கவிதை என்ற எல்லைக்குள் வந்து விடுகின்றது. கவிதை பல்வேறுபட்ட வடிவங்களில் எழுதப்படுகின்ற போதிலும் அவற்றில் உள்ள கவித்துவத் தன்மையே வாசகரைக் கவர்ந்திழுக்கும் முக்கிய காரணியாகும். கவித்துவத் தன்மை என்பது வெறும் சந்தங்களில் மட்டுமல்லாது கவிதையில் சொற்களைக் கோர்க்கும் விதத்திலேயே அதிகம் தங்கியுள்ளது எனலாம். கவிதையில் பயன்படுத்தப்படும் சொற்கள் சாதாரணமானவைகளாயினும், குறைந்த சொற்களையே பயன்படுத்தியிருப்பினும் அவை கோர்க்கப்படும் விதத்திலேயே கவிதை அழகு பெறுகிறது. எனவே ஒரு கவிஞனின் திறமையை வெளிக்காட்டும் முக்கிய அம்சம் அக் கவிஞன் கவிதையில் சொற்களைக் கையாளும் விதமே என்று சொல்லலாம்.

இன்று பரவலாகப் பல கவிதைகள் எழுதப்படுகின்றன. அவற்றுள் மிகச் சொற்பமானவையே கவித்துவத்தில் மேலோங்கி நிற்கின்றன. பெரும்பாலானவை வெறும் சொற்கோர்வைகளாகவே அமைந்து காணப்படுகின்றன. சமகாலத்தில் இளம் கவிஞர்கள் மிகச் சிறப்பான முறையில் கவிதகளை எழுதிக் கொண்டிருப்பதைக் காணக்கூடியதாய் உள்ளது. இளையவர்களில் பலர் தமது கவிதைகளின்பால் வாசகர்களின் எதிர்பார்ப்பினை தூண்டும் படியாக எழுதும் ஆற்றல் கொண்டவர்கள். இவர்களுள் குறிப்பிட்டுச் சொல்லத்தக்க ஒருவர்தான் தியத்தலாவை பாத்திமா ரிஸ்னா. இவர் தனது கன்னி முயற்சியாக 'இன்னும் உன் குரல் கேட்கிறது' என்ற தலைப்பில் ஒரு கவிதைத் தொகுப்பினை இலக்கிய உலகுக்கு அண்மையில் வழங்கியிருந்தார்.

'மெல்லக் கதவினுள் மிடுக்காய் நுழைந்தாள்' என்ற தலைப்பிலான கவிதையே ரிஸ்னாவினது நான் படித்த முதலாவது கவிதை. பெரும்பாலான கவிதைகள் அவற்றை வாசிக்கும்போது கண்களோடு நின்றுவிடுகின்றன. ஆனால் சில கவிதைகள் மனதுக்குள் இறங்கி அதன் ஆழம்வரை விரிந்து விடுகின்றது. மேற்குறிப்பிட்ட கவிதையும் இது போன்ற ஒரு கவிதையே ரிஸ்னாவைப் பற்றிய எந்தவித அறிமுகமும் இல் லாத நிலையில் அக் கவிதையை வாசித்தபோது அது அவரின் கவிதைகளின்பால் ஒரு எதிர்பார்ப்பினை என்னுள் ஏற்படுத்தியது.

'இன்னும் உன் குரல் கேட்கிறது' புரவலர் புத்தகப் பூங்காவின் 30வது வெளியீடாக 72 பக்கங்களில் 56 கவிதைகளுடன் வெளிவந்துள்ளது. நூலின் தலைப்பே இவை காதல் கவிதைகளாகத்தான் இருக்க வேண்டும் என்ற தீர்மானத்தை வாசகர் மனதில் ஏற்படுத்திவிடுகின்றது. இதனை உண்மைப்படுத்துவதாய் கூடுதலான கவிதைகள் காதல் உணர்வினை வெளிப்படுத்தும் கவிதைகளாகவே உள்ளன. ஓரு கவிஞனின் கற்பனை விண்ணையும் தாண்டலாம், மண்ணையும் தோண்டலாம். காற்று மட்டுமே சென்றுவரக்கூடிய மனித இதயத்தினுள் கவிஞன் தனது கற்பனை எத்தனை அழகாக செலுத்திப் பார்க்கிறான் என்பதற்கு ரிஸ்னாவின் கவிதைகள் எடுத்துக் காட்டாய் அமைகின்றன. காதலினை உணர்வதற்கு காதலிக்கத்தான் வேண்டும் என்பதில்லை.

பொதுவாக இளையவர்களிடத்திலேயே காதல் உணர்வுகள் அதிகம் புடையோடி இருக்கின்றது என்பார்கள். இந்த உணர்வினை இளம் கவிஞர் ரிஸ்னாவின் கவிதைகள் வாசகர் மனங்களில் ஏற்படுத்த முனைவதே இவற்றின் சிறப்பு எனலாம். ஒருதலைக் காதலின் வலி, சுகம், காத்திருப்பு, ஏமாற்றம், தியாகம் போன்ற எல்லாப் படிமுறைகளையும் இக் கவிதைகளில் காணலாம்.

'பூச்சி நான்
உன் வலையில்
வேண்டும் என்றே
சிக்கிக்கொண்டேன்!

அப்படியே இரையாக்கி
அன்பால் என்னைத்
தின்றுத் தீர்த்துவிடு!'

தன்னிலையிலிருந்து கவி சொல்லும் ரிஸ்னா ஒன்றிலிருந்து ஒன்றைச் சொல்ல பயன்படுத்தியிருக்கும் எளிமையான சொற்கள் அவற்றை கோர்த்திருக்கும் விதத்திலிருந்து வெளிப்படுத்தும் அழகினை மேலே உள்ள வரிகளில் சிறப்பாய் அவதானிக்கலாம். இப்படியான ஒன்றுக்கொன்று வித்தியாசமான புதிய, புதிய ஒப்பீட்டு அழகினைக் கொண்டு தொகுப்பு முழுவதையும் அழங்கரித்துள்ளார் கவிஞர்.

'மறவாதே...
கயிறு கட்டி
நீ ஆடிய இடமோ
என் இதயமென்ற
ஊஞ்சல்!
சதி செய்து நீ
எனை மறந்தாலும்
பொதி சுமப்பேன்
உன் நினைவுகளை
என் நெஞ்சில்!!!'

இது போன்ற வாசகரைக் கவர்ந்திழுக்கும் புத்தம் புதிய ஒப்பீட்டு வர்ணனைகள் கவிஞரின் கற்பனையின் விஷாலமான தன்மையை வெளிப்படுத்துகிறது. பொதுவாகத் தற்காலக் காதல் கவிதைகளில் கையாளப்படும் கருவும் அவை வெளிப்படுத்தும் உணர்வுகளும் ஒரேவிதமாக இருப்பதனையே காணலாம். உதாரணத்திற்கு நான் அவளைக் காதலிக்கிறேன், பூபோன்ற அவளை நான் காதலிக்கிறேன், என் இதயத்தைக் களவாடிய அவளை நான் உயிரினும் மேலாய்க் காதலிக்கிறேன் இப்படி எத்தனை வரிகளை வித்தியாசமாக வரைந்தாலும் அவை வெளிப்படுத்தும் அர்த்தம் ஒன்றாகவே இருக்கிறது. இது போன்றுதான் தற்காலத்தில் வெளிவரும் அனேகமான காதல்க் கவிதைகள் சொற்கள் வித்தியாசப்படுகிறதே தவிர சொல்பவை ஒன்றாகவே அல்லது முன்ப சொன்னவையாகவே இருக்கின்றன. ஆனால் கவிஞர் ரிஸ்னாவின் கவிதைகள் இப்படிப்பட்ட தன்மையிலிருந்து வேறுபட்டிருப்பதை கட்டாயமாகவே சுட்டிக் காட்டப்பட வேண்டியுள்ளது.

இத்தொகுப்பில் இடம்பெற்றுள்ள கவிதைகள் நீண்ட அல்லது குறுகிய கால இடைவெளிகளில் எழுதப்பட்டிருக்கலாம். ஆனால் ஒரு கவிதையில் பயன்படுத்திய சொற்கள் அல்லது வரிகள் திரும்பவும் வேறு எந்தக் கவிதையிலும் இரண்டாவது முறையாக பயன்படுத்தப்படவில்லை என்பது ரிஸ்னாவின் கற்பனை ஆற்றலை வியக்க வைக்கும் விடயம்.

மேலும் ரிஸ்னாவின் கவிதைகளின் பந்திகளை தனியாக எடுத்து நோக்கும்போது அவை ஒவ்வொன்றும் தனித்தனி அர்த்தங்களுடனான சிறு கவிதைகளாகவும் மிளிர்வதை குறிப்பிடலாம்.

'கனன்றெரியும் செந்தீயில்
குளித்தெழுந்தாலும்
துங்கத்துக்கு மட்டும் ஏனோ
தீக்காயங்கள்
றவேயில்லை!'

இது 'கறையான் பக்கங்கள்' என்ற கவிதையின் ஒரு பந்தி மட்டுமே. ஆனால் இது ஒரு குறுங்கவிதைபோல் தனித்து அர்த்தப்படுவதையும் அவதானிக்கலாம். அது போன்றே இக் கவிதையின் ஏனை பந்திகளும் ஏனைய பெரும்பாலான கவிதைகளின் பந்திகளும் தனித்தும் கவித்துவத்துடன் பொருள்படுவது மற்றுமொரு சிறப்பம்சமாய்ச் சொல்லலாம்.

'காந்தள் மலரின் வாசம் எண்ணி உன்
கூந்தலை அளைந்து
விளையாடிய போதெல்லாம்
பின்நாட்களில் - அது
தேளாய்க் கொட்டும் என்று
நினைக்கவில்லை!'

'உன்
அன்பெனும் ஆலையிலே
நித்தமும்
சாறு பிழியப்படும்
கரும்பல்லவா நான்!
அப்படியே காதலுடன்
என்னை ருசி பார்த்து மகிழும்
எறும்பல்லவா நீ!'

ரிஸ்னாவின் கவிதைகள் வாசகரின் மனதில் எதையும் திணிக்க முற்படுவதில்லை. அழகான அனுபவங்களின் உணர்வுகளையே சொல்லி நிற்கின்றன. பெரும்பாலன இடங்களில் சந்தங்களும் இவற்றுக்கு துணை நின்றுள்ளன. காதல் உணர்வுகளைப் போன்றே ஆன்மீகம், சமூக அவலம் போன்ற விடயங்களையும் கவிஞர் தனது எழுத்துக்களுக்குள் கொண்டுவந்து இத்தொகுதியில் பேசியிருப்பதும் இங்கு குறிப்பிடத்தக்கது.

வ்வொரு கவிதையும் ஒவ்வொரு பக்கத்தில் மட்டும் அமைந்திருப்பதுவும் அளவான தெளிவான எழுத்துக்களில் அச்சிடப்பட்டிருப்பதும் தொகுப்பினை வாசிப்பதற்கு இலகுவாய் உள்ளது.

இத்தொகுப்பிள் உள்ள கவிதைகளில் கூடுதலானவை தன்னிலையிலிருந்து சொல்லப்பட்டுள்ளமையினால் அவற்றை வாசிக்கும்போது பெரும்பாலும் ஆண்பால், பெண்பால் தடுமாற்றம் ஏற்படுகின்றது. அதாவது குறித்த ஒரு கவிதையை வாசிக்கும்போது அக் கவிதை ஒரு ஆணின் நிலையிலிருந்து எழுதப்பட்டதா? அல்லது ஒரு பெண்ணின் நிலையிலிருந்து எழுதப்பட்டதா என்ற மயக் கத் தன்மை கவிதையை பாதி தூரம் வாசிக்கும்வரை தொடர்கிறது. இது வாசகரின் இரசனையை நிலைகுலையச் செய்யக்கூடும் என்பதனாலும்; கவிஞர் ஒரு பெண்ணாக இருப்பதனாலும் எல்லாக் கவிதைகளையும் பெண்ணின் நிலையிலிருந்தே எழுதியிருக்கலாம் என்பது எனது கருத்து.

அடுத்து உள்ளடக்கத்தில் குரல்கள் என்ற தலைப்பின் கீழ் 68 கவிதைகளுக்கான தலைப்புகள் வழங்கப்பட்டுள்ள போதிலும் நூலில் பிரசுரமாகியிருப்பதோ அவற்றுள் 56 கவிதைகள் மாத்திரமே. மீதிப் 12 கவிதைகளுக்கு என்ன நடந்தது? புத்தகக் கட்டமைப்பின்போது விடுபட்டுப்போனதா? என்ற தேவையற்ற கேள்விகளை வாசகர்களிடத்தில் எழுப்பவிடாமல் ஒன்றில் அத் தலைப்புகளை நீக்கியிருக்கலாம் அல்லது நூலின் பக்கங்களை அதிகரித்திருக்கலாம். அதுமட்டுமன்றி இது புரவலர் புத்தகப் பூங்காவின் வெளியீடாக இருப்பதனால் அதனுடன் 'ஹாசிம் உமர்' என்ற பெரும்புள்ளி இருப்பதனால் பணக் கஷ்டம் ஏற்படுவதற்கான வாய்ப்பில்லை. எனவே புத்தகக் கட்டமைப்பில் இன்னும் கூடிய கவனம் செலுத்தப்பட்டிருக்க வேண்டும் என்பது இங்கே அவதானிக்கப்பட வேண்டிய விடயம். அதே போன்றே 'புரவலர் புத்தகப் பூங்கா' ஆளுகைக் குழுவில் பெரும்பெரும் ஜாம்பவான்கள் எல்லோருமிருந்தும் நூலில் ஆங்காங்கே எழுத்துப் பிழைகள் காணப்படுவதும் ஆச்சரியப்பட வேண்டிய விடயமே.

எனவே இதுவரை 30 திறமையான எழுத்தாளர்களின் நூல்களை வெளிக் கொணர்ந்த 'புரவலர் புத்தகப் பூங்கா' எதிர் காலத்தில் இன்னும் பல திறமையாளர்களின் ஆக்கங்களுக்கு நூலுருவம் கொடுக்கும்போது அதன் கட்டமைப்பு சர்வதேச தரத்தில் அமைய வேண்டும் என்பது எனது தாழ்மையான வேண்டுகோல்.

தலைப்பிற்கு ஏற்றாற்போல் வர்ணக் கலவையுடன் அழகியதாய் அட்டைப்படம் அமைந்திருப்பது நூலை கையிலெடுத்துப் படிப்பதற்கான ஆவலைத் தூண்டுவதாய் உள்ளது. அதேநேரம் அதில் பிரசுரமாகியிருக்கும் பெண்ணின் உருவப்படம் சற்று கவர்ச்சியாய் இருக்கிறது என்றும் சொல்லத் தோன்றுகிறது.

சிறந்த சிறுகதை எழுத்தாளரான தியத்தலாவை எச்.எப். ரிஸ்னா இலங்கையில் விரல்விட்டு எண்ணக்கூடிய அளவு முஸ்லிம் பெண் எழுத்தாளர்களுள் தன்னையும் ஒருவராக நிலைநிறுத்தியிருப்பது பாராட்டத்தக்கது. இவரது எதிர்கால முயற்சிகள் சமூக எழுச்சியில் தாக்கத்தை ஏற்படுத்தக்கூடிய விடயங்களை உள்வாங்கியதாக அமைய வேண்டும் என வாழ்த்துவதுடன் இவரின் ஆற்றல்கள் மென்மேலும் வளர்வதற்கு இறைவன் அருள்பரிவானாக எனப் பிரார்த்தனை செய்கின்றேன். இன்னும் உன் குரல் கேட்கிறது இனிமையாக....

நூலின் பெயர் - இன்னும் உன் குரல் கேட்கிறது
நூலின் வகை - கவிதைகள்
நூலாசிரியர் - தியத்தலாவ எச்.எப். ரிஸ்னா
வெளியீடு - புரவலர் புத்தகப் பூங்கா
தொலைபேசி - 0775009222, 0719200580
விலை - 180 ரூபாய்